అరికట్టే ప్రావీణ్యం మన చేతల్లోనే

నా మదిలో … అంటూ ప్రవీణ్ గార్లపాటి చెప్పే కబుర్ల బ్లాగు, అతి క్లిష్టమైన కంప్యూటర్ సాంకేతిక విషయాల నుండీ తెలుగు సినిమా హీరోల డాన్సు స్టెప్పుల విశ్లేషణ వరకూ, వైవిధ్య వినోద విజ్ఞాన భరితమైన బ్లాగు. మన చేతిలో ఉన్నది మనమేం చెయ్యొచ్చో తన మదిలో ఆలోచనలు పంచుకుంటున్నారు.
*** *** ***

గ్లోబల్ వార్మింగు ఎందుకు జరుగుతుంది అంటే ఎన్నో కారణాలు, ఇప్పటికే మన బ్లాగర్లు ఎంత మందో ఎంతో విపులంగా ఈ విషయం మీద రాసారు.
దాని వల్ల వచ్చే నష్టాలు కూడా వివరించారు…

ఎన్ని ప్రాణులు దీని వల్ల అవస్థలు పడుతున్నాయో, ఎక్స్టింక్షన్ కి దగ్గరలో ఉన్నాయో ఓ సారి గూగుల్ ని అడిగితే చెబుతుంది.

కాబట్టి దీనిని అరికట్టడం మనుషులుగా మన కర్తవ్యం, అవసరం కూడా.

అలాగని పెద్ద పెద్ద స్లోగన్‌లు అరవనవసరం లేదు. అత్యంత క్లిష్టమయిన పనులు చెయ్యక్కర్లేదు.
మన పరంగా కొన్ని మార్పులు చేసుకుంటే చాలు. అలాంటివి మచ్చుకి కొన్ని:

– ఠంచనుగా బైకుకి/కారుకి/వాహనానికి పొల్యూషన్ సర్టిఫెకెట్టు చేయించడం.

మన జనాలలో ఒక యాభై శాతం మంది దగ్గర ఇది ఉండదు… ఉన్నా ఏదో మొక్కుబడిగా చేయించడం తప్పితే దీని అవసరం తెలియదు.

ఈ సర్టిఫికెట్టు కేవలం ఒక ట్రాఫిక్ రూలు కోసమే కాదు. అసలు మీ వాహనం ఎంత పొల్యూషను సృష్టిస్తుందో తెలుసుకోవడానికి కూడా. ఒక స్థాయి దాటి ఉండకూడదు. ఎందుకంటే వాహనాలు విడుదల చేసే హానికరమయిన పొగల వల్ల వాతావరణానికి ఎంతో చెడు కలుగుతుంది.

మీ వాహనం అలాంటిదో కాదో తెలుసుకునే మార్గం ఇది. అలాగే పొల్యూషను స్థాయి తగ్గించడానికి అవసరమయిన పనులు చేపట్టేందుకు ఒక మూలం. (సర్వీసింగు చేయించడం మొదలయినవి)

– కంప్యూటరు, లాపుటాపులను అనవసరంగా వాడడం.

అవసరమున్నా లేకపోయినా మన కంప్యూటర్లను ఆన్ చేసే ఉంచుతాము మనం కొన్ని సార్లు. (నా లాంటి కొంత మంది చాలా సార్లు)

ఆఫీసులో ఉండే మీ డెస్కుటాపులను మీరు ఇంటికి వెళ్ళేటప్పుడు షట్‌డవున్ చేస్తారా ? మనది కాదుగా కరెంటు పోయేది అనే ఆలోచన. కానీ దీని వల్ల ఎంత కరెంటు వృధా అవుతుందో కదూ… అలాగే మీరు లేనప్పుడు డెస్కుటాపు పని చేస్తున్నా మానిటర్ ఆన్ అయి ఉండాల్సిన అవసరం లేదు. దానిని అయినా కట్టెయ్యవచ్చు.

కొంత మంది పడుకునేటప్పుడు లాపుటాపు మీద చదువుతూ అలాగే నిద్రపోతారు దానిని ఆపకుండా. రాత్రంతా అలాగే నడుస్తుంటుంది అది అవసరం లేకపోయినా. కొంత శ్రమ తీసుకుని సరిగా ఆఫ్ చేయడం అలవాటు చేసుకోవాలి.

పొద్దున్న నుంచి సాయంత్రం దాకా కంప్యూటరు ముందే ఉండకుండా కాసేపు మన కుటుంబంతో కలిసి మాట్లాడడం చెయ్యవచ్చు.

– నీటిని వృధాగా పోనివ్వడం.

ఉదా: బ్రష్ చేసుకుంటూ టాపుని అలాగే వదిలేసే వారిని నేను చూసాను. కట్టేసి కావలసినప్పుడు వాడుకుంటే నీళ్ళ వాడకమూ తగ్గుతుంది. అలాగే వనరుల వృధా కూడా కాదు.

అలాగే ఇంట్లో ఉన్న టాపులు కొన్ని కారుతూనే ఉంటాయి. వాటిని సరి చేయించాలి.

– ఆఫీసు కాబులు, వాహనాలు వాడడం.

అటు మీకు వాహనం నడిపే శ్రమా తగ్గుతుంది. ఇటు ఇంధనం ఆదా చేసిన వారూ అవుతారు. ఇంటికి సమయానికి చేరతారు.

కుదిరితే కార్ పూలింగు, బైకు షేరింగూ కూడా చెయ్యవచ్చు.

ఆలోచిస్తే ఇలాంటివే ఎన్నో….

మనం చేసే చిన్న చిన్న పనులు ఎంతో ప్రభావం కలిగిస్తాయి. మనకూ, ఇతరులకూ, పర్యావరణానికీ మేలు చేస్తాయి. అంతే కాదు ఈ ఆచరించదగిన పనులు మీకు డబ్బు, శ్రమ వృధా కాకుండా కాపాడతాయి.

ఇక బత్తీ బందు లాంటి కార్యక్రమాలు చెయ్యడం కేవలం జనాలలో జాగృతి తేవడానికే అని గుర్తించాలి. చెయ్యకపోతే వచ్చే నష్టాలు ఏమీ లేవు. మనం చేయదలచుకున్న మంచి పనులను సింబాలిక్ గా చూపించడమే ఇందులోని ఉద్దేశం. అంతే కానీ బలవంతంగా లైట్లు కట్టుకు కూర్చోమని కాదు.

మనకి తెలిసిన విషయాలను నలుగురితోనూ పంచుకుంటే ఒక మంచి పనికి సహాయం చేసామనే తృప్తి కుడా మిగులుతుంది. కాబట్టి సాధ్యమయినంత మంది జనాలకు గ్లోబల్ వార్మింగు గురించి వివరించండి. ఎలా అరికట్టచ్చో తెలియజేయండి. అన్నిటి కన్నా ముఖ్యంగా మీరు ఆచరించి చూపండి.

Confessions of a programming hit-man!

ఆది బ్లాగరుడు కిరణ్ చావా సూర్యుణ్ణి అనుసరించ మంటున్నారు .. ఎంతైనా కిరణుడు కదా!

*** *** *** ***

ముందుగా బత్తీ బంద్ గురించి ఎక్కడ విన్నానో సరిగ్గా గుర్తు లేదు కానీ, విన్నప్పట్నుండి ఈ కాన్సెప్టు నన్ను ఆకర్షించలేదు. కానీ ఆ రోజు నుండి బత్తీ బంద్ గురించి వింటూనే ఉన్నాను. పన్లేని పని అనుకుంటూనే ఉన్నాను. ఆ తరువాత మన మీడియా వాళ్లు కూడా హడావుడి చేసినట్లున్నారు కానీ మన ప్రస్తుత జీవన గమనంలో టీవీకంత సమయం కేటాయించట్లేదు, దొరికిన కాస్త టయమూ రిమోట్ చేతికొస్తే ఏ టాం అండ్ జెర్రీనో, డిస్నీలో అదేదో హోటల్లో ట్విన్ పిల్లల ప్రోగ్రామో జూమ్ టీవీలో పాటలో స్టార్ లో డిష్యుం డిష్యుం సినిమానో, తేజాలో ** నాయుడు అనే దక్షిణ భాషా డబ్బింగ్ సినిమానో లేకపోతే పైవన్నీ ఒకేసారో చూస్తుండటంవల్ల మీడియా హడావుడి పెద్దగా తగల్లేదు.

కానీ తరువాత బత్తీబంద్ బ్లాగ్ మొదలయింది. అప్పటికీ లైట్ తీసుకున్నాను. కానీ ఓ రోజు కొపా గారు నన్ను కూడా ఈ బ్లాగ్ కి ఓ పోస్ట్ వ్రాయమన్నారు. బుక్కయిపొయ్యా అనుకొని నాకీ బత్తీ బంద్ అంటే పడదు అని ఇన్ డైరెక్టుగా చెపుదామని చూశాను కానీ అక్కడ సక్సస్ అయితే ఈ పోస్ట్ వ్రాయవలసిన అవసరమేముంది చెప్పండి!

ఫ్రెండ్ సర్కిల్లో ఓ చిరంజీవి ఫ్యానూ, ఓ నాగార్జున ఫ్యానూ, ఓ బాల కృష్ణ ఫ్యానూ ఉంటే మీరెవ్వరికీ ఫ్యానయినా ముగ్గురి సినిమాలూ చూడక తప్పదు! అలాగే ఏదో ఒకటి వ్రాద్దామంటే హృదయభాను(టీయం) ధర్మరాజు, చక్కర తినడం, పసివాడు అంటూ ఏదో గొడవ చెయ్యసాగింది. సర్లే నాకు బత్తీ బందు ఎందుకు నచ్చలేదో రాద్దామంటే ఆల్రడీ ఆపని మన రానారే చేశాఅడు. దానికి తోడూ మనకీ మధ్య రకరకాల పనుల్తో పనులెక్కువయ్యి మనసుపెట్టే టైం దొరకలేదు. కానీ కొంచెం ఖాలీ దొరికినా హృదయభాను(టీయం) గాడు కొపా, బత్తీ బంద్, ఐ యాం కౌంటింగ్ ఆన్ యూ అంటూ ముల్లుగర్రతో పొడవసాగాడు, దానితో

while (1)
{
ఆలోచించు;
ఆలోచించు;
if($timeout)
break;
}
అనే ప్రోగ్రాం మనసు రన్ చెయ్యడం మొదలుపెట్టింది. ఇలా ప్రోగ్రాం రన్ అవుతుంటే కొన్ని జ్ఞానోదయాలయ్యాయి!

బత్తీ బంద్ మరీ నేననుకునేంత చెత్త ప్రోగ్రాం కాదు. ఎక్కడ మొదలయిందో అక్కడ ఇదో మంచి సృజనాత్మక అవిడియా. దీనిలో ఫన్ ఉంది, సృజనాత్మకత ఉంది, జనాలు తేలిగ్గా ఫాలో అవ్వవచ్చు. ప్రకృతి, పర్యావరణాలపై అవగాహన మాస్ కి తేలిగ్గా ఇవ్వవచ్చు. సెన్సేషన్ ఉంది. మీడియా వాడికి హడావుడి చెయ్యడానికి కావల్సిన ఎలిమెంట్ ఉంది.

ఇన్ని ఉన్నాయి కానీ ఇది ఏ ఆస్ట్రేలియానో అమెరికానో అయితే సరిపోతుంది. ఓ గంట కరంటు పోతే క్యాండిల్లా అంటే ఏమిటి అని అడిగే దేశాఅల్లో బాగుంటుంది. కానీ లెఫ్ట్ అండ్ రైట్ విచక్షణారహితంగా కోతలున్న మన దేశంలో? కావాలని క్రియేట్ చేస్తే తప్ప వచ్చే సెన్సేషన్ లేదు.

ఇలా ఇంటర్మీడియట్ రిజల్ట్ వచ్చాక బ్యాచ్ లో ప్రోగ్రాం మారింది.

while(1)
{
మంచి ఐడియా కావాలి;
మంచి ఐడియా కావాలి;
if ($timeout)
break;
}

ఇలా ప్రోగ్రామ్ కొత్తది రన్ అవుతూనే ఉంది. కానీ రిజల్ట్ మాత్రం రావట్లేదు. ఓ నాలుగు సూపర్ బ్రెయిన్ లు రన్ చేస్తే కానీ రిజల్ట్ వచ్చేలా లేదు అనుకున్నాను.

అటువంటి రోజు విహారి ఓ పోస్టేశారు – బత్తీ బంద్ బ్లాగులో. బాగుంది, కనీసం ఆ పోస్టుకి గౌరవం ఇస్తూ అన్నా బల్బులు బంజేసి చేతులు దులుపుకుందాం అనుకున్నా.

ఆ తరువాత రోజు బస్సులో ఫుల్లు ఏసీలో ఆఫీసుకెల్తూ కునుకుతీసి బ్యాగు వాటేసుకోని ఓ కల కని లేస్తే స్ర్కీన్ పై సూర్యోదయం అయింది.

ఇదేమిటి? స్లీప్ మోడ్ నుండి బయటకొచ్చాక కూడా స్క్రీన్ సేవర్ పోలేదు!! అని చూస్తే అది స్క్రీన్ సేవర్ కాదు. ప్రోగ్రాం అవుట్ పుట్!!!!!

ఎంత బండ ప్రోగ్రాం అయినా ఒక్కోసారి బగ్గుల్లేకుండా కరక్టు అవుట్ పుట్ ఇస్తుంది కదా అనుకుంటూ స్క్రీన్ వైపు చూస్తే “ఫాలో ద సన్” అని కన్పించింది.

ఇదేమిటి? మ్యాట్రిక్స్ ఫాలో ద వైట్ రాబిట్ లా ఫాలో ద సన్!!! దీన్ని డీక్రిప్ట్ చెయ్యడానికి మరో ప్రోగ్రాం రాయాలా అని
while(1) అని మొదలుపెట్టగానే హృదయభాను గాడు ముల్లుగర్రతో ఓ పోటు పొడిచి

“ఎదవన్నర ఎదవ!
ఆ మాత్రం అర్థం కాలేదూ!!
ఫాలో ద సన్ అంటే పొద్దున్నే సూర్యుని కంటే ముందు అనగా 4AM కి లేచి ఆయనతో పోటీ పడి పనులు చేసుకొని ఆయన అటు పోగానే బబ్బోవాలి అని అర్థం, అంటే 8PM కి బబ్బోవాలి, మళ్లా తరువాత రోజు పొద్దున్నే 4AM కి షురూ మొదలు. ఇలా అయితే కరంటు చాలా పొదుపు, గ్లోబల్ వార్మింగ్ చాలా తగ్గిద్ది, ఆల్ హ్యాపీస్”

అని చెప్పంగనే అవునా? అయితే పరిశీలిస్తా అని మనవి చేసి తరువాత రోజు 9 కి లేచి టిఫెన్ మానేసి బస్ కోసం పరుగు తీసి మిస్సయ్యాను.

అన్నట్టు మీ టైం సైకిల్ ఏమిటి?

గ్లోబల్ వార్మింగ్ .. ఒక “వాడి” పరిశీలన

తెలుగు బ్లాగరుల్లో ఆరితేరిన శస్త్రవైద్యులు కొందరున్నారు. వాళ్ళ దృష్టి ఎక్స్రే. వాళ్ళ బుద్ధి పదునైన స్కాల్పెల్. వాళ్ళ మాటలు, రచనలు .. సమాజంలోని అనారోగ్యకర అంశాల్ని కత్తిరించే శస్త్ర చికిత్సలు. వారిలో తెలుగు “వాడి”ని ప్రముఖులు. జాగ్రత్త సుమా, ఈయన పేరే కాదు, మాటలూ వాడే.
*** *** *** ***

ముందుగా ఇక్కడ నేను నాలుగు ముఖ్య విషయాలు ప్రస్తావించదలిచాను :

1. కొత్తపాళీ గారు నన్ను ఈ విషయంపై నా మాటల్లో ఒక టపా రాసి పంపించమని చెప్పిన తరువాత నేను మన తెలుగు బ్లాగుల్లోని టపాలను కానీ మరియు వెబ్ సైట్స్ లో ఉన్న ఆర్టికల్స్ ను గానీ చదవలేదు ఏవో కొన్ని ప్రముఖ వెబ్ సైట్స్ మరియు అమెరికాలో ఉన్న కొన్ని పెద్ద కంపెనీస్ Green Energy కి సంబంధించి చేస్తున్న కార్యక్రమాలను గురించి తెలుసుకోవాలని తప్ప.

2. ఇక్కడ నేను వ్యక్తపరచినవి మీరు మీ టపాలలో చెప్పినవాటికి దగ్గరగానో లేక మక్కీకిమక్కీ కాపీలాగా ఉన్నాయని నన్ను నిందించినా/జోకులేసినా ఫర్వాలేదు కానీ మిమ్మల్ని మీ ఆలోచనలని నేనేదో criticize చేశానని మాత్రం బాధపడకండి … అన్యధా భావించకండి నా ఉద్దేశ్యం అది కాదు… అది కేవలం యాధృచ్చికం/కాకతాళీయం అంతే.

3. నేను మనసు పెట్టి చేసే పనులన్నీ, రాసే రాతలన్నీ సాధ్యమైనంతవరకు generic గా, long term ను దృష్టిలో పెట్టుకుని, వీలైనంతవరకు ఎక్కువ విశ్లేషనాత్మకంగా/వివరంగా చెప్పటానికి. చేయటానికి ప్రయత్నించటం అలవాటైపోయింది కనుక ఇక్కడ నేను చెప్పింది/రాసింది కొంచెం ఎక్కువగా అనిపిస్తే అలవాట్లో పొరపాటు అని వదిలెయ్యండి దయచేసి … అంతే గాని అసలు ఈ కార్యక్రమం మీద అసహ్యాన్ని పెంచుకోకండి.

4. అసలు ఈ గ్లోబల్ వార్మింగ్ అంటే ఏమిటి, ఎందుకు/ఎప్పుడు/ఎలా వచ్చింది, large scale లో ఎలా అరికట్టాలి, ఒకవేళ అరికట్టకపోతే కలిగే పర్యవసానాలు ఏమిటి అనే వాటి గురించి నేను ఇక్కడ చర్చించలేదు ఎందుకంటె వీటికి సంబంధించిన విషయాలు మీకు నెట్/గూగుల్ లో వెతికితే సులభంగా దొరకటం ఒక కారణం అయితే, కొత్తపాళి గారు నేనేమి అనుకుంటున్నానో, నేను చేసే సూచనలు ఏమిటో తెలపమనటం ఇంకొక కారణం

ఈ గ్లోబల్ వార్మింగ్ అనే కాదండి … పర్యావరణానికి లేదా/మరియు సామాజిక స్పృహకు లేదా/మరియు Mass Scale లో చెప్పవలసిన/ఆచరించవలసిన ఆవసరాన్ని గుర్తించిన/సంబంధించిన ఏ విషయాలకైనా ఆ దేశ స్థితిగతులు, ఆలోచనాసరళి, పధ్ధతులను బట్టి వాటియొక్క ఆవశ్యకతను తెలియజెప్పే విధానాలు మారాలి ముఖ్యంగా … అలా కాకుండా ఏదో పాశ్చాత్యదేశాలు వాళ్లు అలా చేస్తున్నారు కాబట్టి మనం కూడా మూర్ఖత్వంగా లేక వేరే దారిలేక ఫాలో అయిపోవటం కాదు.

ఎందుకంటే మన దగ్గర … వీడికేదో లాభం లేకపోతే వీడెందుకుచేస్తాడు ఇది .. దీనివలన నాకేంది అనేదే మొదటి ప్రశ్న … నీకు నచ్చితే నువ్వు చెయ్యి మమ్మల్ని ఎందుకు చంపుతావ్ .. వెళ్లెల్లవయ్యా ఈ మాత్రం మాకు తెలియదా ఏంది పెద్ద పోటుగాడిలా బయలుదేరావు .. ఎదురుగా ఉన్నోడు ఆకలితో చచ్చిపోతుంటే ఒక ముద్ద అన్నం పెట్టటం చేతగాదు గానీ అక్కడెక్కడో మంచుగడ్డలు విరిగిపోతున్నయ్, వడగాల్పులు ఎక్కువ వీస్తున్నయ్ ఇంకో 100/200 (కొన్ని వేల సంవత్సరాలకి) ఏదో అయిపోతుందని వెధవ నస, మనం ఒక్కళ్లం చేస్తే అవుద్దా … ప్రభుత్వం, డబ్బులుండాళ్లు చెయ్యాలి ఇలాంటివన్నీ … అసలు విషయానికన్నా మనం ఇలాంటివాటికి ఎక్కువ సమయం కేటాయించవలసి ఉంటుంది .. కొంతలో కొంత అయినా మన నిజాయితీని, చిత్తశుధ్ధిని నిరూపించుకోవలసి ఉంటుంది … ఎక్కడో ఒకచోట బయలుదేరిన ఇలాంటి ఉద్యమాలు జనబాహుళ్యంలోకి ఎంతబాగా చొచ్చుకుపోయినా కూడా ఇక్కడి ప్రభుత్వాలు, పెద్ద కంపెనీలు కనీసం ప్రోత్సాహించటానికైనా త్వరితగతిన దూకుదామని అనుకోవు.

అదే అక్కడ అయితే ఓపెన్ నెస్స్ ఎక్కువ ఉంటుంది … ఏ వివరాలు కావాలన్నా మీకు క్షణాలలో అందుతుంది .. ఈ రోజు కాకపోతే రేపు అయినా బయటపడితే పడే శిక్షలు/కష్టాలు కూడా కొంచెం భారీగానే ఉంటాయి కనుక అందరూ జాగ్రత్తగానే ఉంటారు .. విషయప్రాధాన్యం ఉన్న ఇలాంటి వాటికైతే ప్రభుత్వాలు, పెద్డ కంపెనీలు, ప్రముఖ వ్యక్తులు, సంస్థలు మొదలగునవి(వారు) వెనువెంటనే రంగంలోకి దూకి విస్కృతమైన ప్రచారం కల్పిస్తారు

ఇంకొక ముఖ్యమైన తేడా ఏమిటి అంటే … ఈ పాశ్చాత్య దేశాలలో చాలా వరకు, నిన్న మొన్నటి వరకు ఎక్కువ మంది self-centered (దీనికి చాలా వరకు ఆయా దేశాలలో కఠినంగా అమలు చేసే నియమాలు, ప్రభుత్వ పధకాలు, పెన్షన్ సౌకర్యాలు, ఆధునిక జీవనశైలి మొదలగునవి అయితే అయ్యుండొచ్చు గాక)అంటే నా అనే భావం తప్ప, మనము అనుకోవటం, సమాజం ఇలాంటివి వీరికి తెలియవు .. ఇప్పుడిప్పుడే వీళ్ల ఆలోచనా ధోరణిలో మార్పు వస్తూ ఉంది కనుక .. అదీనూ ఇది ప్రాధమిక దశను దాటి టీనేజ్ దశకు ఇప్పుడే వచ్చింది కనుక ఆ ఉత్సాహంతో వీళ్లు ఇలాంటి వాటిపై సహజంగానే ఎక్కువ ఆసక్తి చూపిస్తారు.

కానీ మనం అలా కాదే … మనం తి(పు)రోగమనం లో ఉన్నాం (మంచికో, చెడుకో అది కాలమే నిర్ణయిస్తుంది) … నిన్నటిదాకా మన ఊరు/పల్లె/గ్రామం/సమాజం/సంఘం నుంచి … మనము అనేదానిలో నుంచి నా అనే దానికి మాత్రమే పరిమితం అవుదామనే ఆలోచనలతో ఎదుగుతున్నప్పుడు .. ఈ బత్తీబంద్ లాంటివి మనకి పెద్దగా పట్టవు .. అందుకే మన కృషి, ప్రయత్నాలు వేరే విధంగా ఉండవలసిన అవసరం ఉంది …

ఇది ఒక్కటే నివారణ మార్గం అన్నట్టు ప్రచారం చేస్తుంటే, నేనైతే ఈ గంటసేపు బత్తీబంద్ లాంటి వాటికి వ్యతిరేకం ముఖ్యంగా మన ఇండియా లాంటి దేశాలలో .. అలాగని ఇది అసలు ఉపయోగం లేనిదని చెప్పటం నా ఉద్దేశ్యం కాదు … అమెరికా, ఇంగ్లండ్ లాంటి దేశాలలో కరెంట్ పోవటం/లేకపోవటం లేక గంటలగంటలు (4-6 లేక 10-15) కరెంట్ కట్ అంటే ఏమిటో వారికి తెలియదు కాబట్టి వాళ్లకి ఈ గంట కాదు .. మీరు నెలకొకసారి ఇలా గంట ఆపమన్నా వారికి పెద్ద సమస్య ఉండదు పైపెచ్చు వాళ్లు ఏ బార్బిక్యూనో ఏదో .. అదీ కాకపోతే ఒక బర్గర్, బీర్ పట్టుకుని కాలక్షేపం చేస్తారు … ఇంకొకటి ఏమిటి అంటే ఏమాత్రం కొంచెం చిన్న ఫలితం కనిపించినా వాళ్లు ఇలాంటి వాటిని బాగా ప్రోత్సహిస్తారు … అలాగే ఫలితాలను/ప్రయోజనాల వివరాలను అందరికీ చేరేలా రకరకాలైన మార్గాల ద్వారా ప్రయత్నిస్తారు …

ఈ బత్తీబంద్ లాంటి కార్యక్రమాలు ప్రైమ్ టైమ్ లోనే చెయ్యాలి అనే నియమం పెట్టుకోకుండా ఉండాలి .. ఒకవేళ మొదట కొన్ని సార్లు అలా చేసినా, వీలైతే ఇందులో పార్టిసిపేట్ చేయని వారి ద్వారా వారి అయిష్టానికి కారణం ‘సమయమే’ అయితే తరువాత జరిపేటప్పుడు మార్చండి సింపుల్ గా … అలాగే వీరిని ఎంకరేజ్ చేయండి ఈ గంట కాకపోతే ఇంకొక గంట ఆర్పండి అని చెప్పటం ద్వారా … ఈ సమయం గురించి నేను ఇంత ప్రత్యేకంగా చెప్పటానికి కారణం ఏమిటి అంటే, అమెరికా/ఇంగ్లండ్/ఆస్ట్రేలియా లాంటి దేశాలలో లు ఉంటాయి కనుక వారు ఆ కార్యక్రమాలను రికార్డ్ చేసుకుని మరుసటి రోజు లేదా ఆ గంట తరువాత చూసే అవకాశం ఉంటుంది మరియు ఆ టి.వి నెట్ వర్క్ వారు లేదా ఎవరో ఒకరు యూట్యూబ్ లాంటి వెబ్ సైట్స్ లో అవే ఎపిసోడ్స్ అప్ లోడ్ చేస్తారు కనుక వాళ్లు మిస్ అయ్యేది ఏమీ ఉండదు .. కానీ మనకు అలా కాదు కనుక ఈ సమయం గురించి కొంచెం జాగ్రత్తగా ఉంటే మంచిది .. ఎప్పుడూ పదిగంటలకు లైట్స్ తీసేసే వాళ్ల చేత తొమ్మిది గంటలకే లైట్స్ ఆపించగలిగితే అదే పదివేలు.

మనకి ఎలా ఉంటుంది అంటే … ప్రతి ఒక్కరూ పెద్ద ఫోజులు కొట్టుకుంటూ బత్తీబంద్ చేద్దాం, గాడిద గుడ్డు చేద్దాం అని బాగా ఎగురుతారు … సరే నచ్చిన వాళ్లు ఎవరన్నా నిజంగా ఆచరిస్తే తరువాత వాళ్లని ఎంకరేజ్ చేసే విధంగా ఏదైనా సమాచారం ఉదా : ఈ గంటసేపు ఇలా బత్తీబంద్ చేయటం వలన కలిగిన ప్రయోజనాలు ఇవి (” నేను సైతం …” టైపులో అనే భావన కలిగించటానికి ) … లేదా/మరియు ఉత్సాహం ఉన్న వ్యక్తులు అడిగే, ఎంత మంది పార్టిసిపేట్ చేశారు, మనం ఏమి సాధించాము లాంటి ప్రశ్నలకు సమాధానాలు ఇవ్వగలవారు ఒక్కరు కూడా ఉండరు .. అలాంటి వ్యవస్థ కూడా ఉండదు .. లేదా తయారు చేయటానికి వీళ్లు చేసిన/చేస్తున్న ప్రయత్నాల వివరాలు కూడా వీరివద్ద సిధ్ధంగా ఉండవు … ఇలాంటి కొత్తవాటికి అవటానికి కనీసం కొంత సమయం ఇవ్వవలసిన అవసరం ఉంది .. కాని మొన్నీమధ్యన గుంటూరులో మిర్చి యార్డ్ ధగ్ధం అయిపోతే నష్టం ఎంత అని తేల్చటానికి కొన్ని రోజులు పట్టింది .. ఇది ఆసియాలో అతి పెద్దది కానీ ఎన్ని సంవత్సరాల నుంచి ఇక్కడ ఈ వ్యాపారం, ఎన్ని క్వింటాళ్ల వ్యాపారం జరుగుతుంది, ఏ రోజు ఎంత, ఏ రకం ఎంత అనే లెక్కలు కూడా అందుబాటులో ఉండవు .. అదీ మన పరిస్థితి.

అదే అక్కడ అయితే కోరుకున్న వెంటనే చాలా విపులమైన వివరాలు/లెక్కలు .. ఎన్ని కుటుంబాలు, కర్మాగారాలు, కార్యాలయాలు మొదలగునవి పార్టిసిపేట్ చేశాయి/రు, ఎంత ఎనర్జీ సేవ్ చేశారు మరియు ఎంత తక్కువ CO2 విడుదల అయ్యింది … అందరికీ అందుబాటులోకి తెస్తారు … అన్ని పత్రికలు, మీడియా ఈ కార్యక్రమాలనే కాదు … వాటి ఫలితాలను కూడా జనాలకు చేరవేయటానికి తమ వంతు బాధ్యతగా కృషి చేస్తాయి.

On March 31 2007, for one hour, Sydney made a powerful statement about the greatest contributor to global warming – coal-fired electricity – by turning off its lights. Over 2.2 million Sydney residents and over 2,100 businesses switched off, leading to a 10.2% energy reduction across the city.

Driving change in Stockholm : http://www.ibm.com/podcasts/howitworks/040207/images/HIW_04022007.pdf

The Results : The road charging system has made a real impact in congestion and overall quality of life for the citizens of Stockholm. By the end of the trial, traffic was down nearly 25 percent. Public transport schedules had to be redesigned
because of the increase in speed from reduced congestion. And even inner-city retailers saw a six percent boost in business.

But the benefits go beyond fewer cars:

l During the spring of 2006, 40,000 more travelers used Stockholm Transport on an ordinary weekday than the year before—an increase of six percent.
l The reduction in traffic during the Stockholm Trial has led to a drop in emissions from road traffic by eight to 14 percent in the inner-city.
l Greenhouse gasses such as carbon dioxide have fallen by 40 percent in the inner-city and by two to three percent in Stockholm County.

The new Swedish government will reintroduce congestion charging in July 2007. And in the US, the federal government has allocated $130 million to implement similar congestion pricing systems.

ఇలాంటి వాటికి సందేహ నివృత్తి చేయకపోవటం అంటే కడివెడు పాలల్లాంటి, మీలాంటి వారందరి కృషికి మీరు స్వయంగా అవతలివారికి ఒక చుక్క విషం చేతుల్లో పెట్టిన చందంగా ఉంటుంది. అందుకే సంయమనం కోల్పోకండి. నిగ్రహంతో వ్యవహరించండి. ఓర్పు ఎంత ముఖ్యమో మీరు కలిసే జనాలు పెరిగేకొద్దీ మీకే బాగా అర్ధమవుతుంది. ప్రభుత్వాలు, స్వఛ్ఛంద సంస్థలు మొదలగునవి కొన్ని వందల వేల కోట్లు ఖర్చుపెట్టినా ఎయిడ్స్ లాంటి విషయాలపై జనసామాన్యంలో ఎంత అవగాహనను కల్పించగలిగాయో మనకందరికి తెలిసిన విషయమే కదా ….

సరే ఇంతకూ నేను ఎందుకు దీనిని సపోర్ట్ చేస్తున్నాను/చేస్తాను అంటే …

ఎక్కడో ఒక చోట మొదలు పెట్టాలి … ఇది ఎంత మంచిది, ఉన్నవాటిలో అత్యుత్తమమైనదా కాదా అని విశ్లేషించుకునే బదులు కొద్దిలో కొద్దిగానైనా దీని వలన ఉపయోగం ఉంది అని తెలిసినప్పుడు ముందు ఆచరించటం/ప్రోత్సహించటం ముఖ్యం … ఎందుకంటే సమిష్టి కృషితో దీనినే అత్యుత్తమమైనదిగా తీర్చిదిద్దవచ్చు కనుక … ప్రతి పనికీ అన్నిసార్లు అన్నీ అందుబాటులో ఉంచుకొని, అన్నీ ఆలోచించి పని ప్రారంభించాలి అంటే కుదరకపోవచ్చు లేదా అది మంచి పధ్ధతి కాకపోవచ్చు లేదా సమయాభావం అయిపోవచ్చు ..

ఒకచోట గుడి/మసీదు/చర్చ్ కట్టాలి అనుకుంటే, గోతులు తవ్వాలి, పునాదులు లేపాలి, ఇటుకమీద ఇటుక పేర్చాలి … గోడలు కట్టాలి, స్లాబ్ వెయ్యాలి, రంగులు వెయ్యాలి … దేముడి పటాలు/విగ్రహాలు పెట్టాలి.. పూజలు చెయ్యాలి, ప్రార్ధనలు చెయ్యాలి అంటే ఏళ్లు పూళ్లు పట్టొచ్చు .. అందుకే కొన్ని సార్లు Out of the box ఆలోచించాలి .. అంటే సింపుల్ గా ఒక మంచి ప్రదేశం చూసుకొని తెల్లారే సరికల్లా ఒక దేముడి పటం, కొన్ని నిమ్మకాయలు, పసుపు/కుంకుం, శిలువ ఏవైతే అవి పెట్టేసి ఒక నాలుగు ముక్కలు జనాల దగ్గర ఊదాము అంటే … రెండు మూడు సంవత్సరాలలో కావలసింది, నాలుగైదు నెలల్లోనే అయిపోతుంది ..

ముందుగా మన ఇండియా వరకు Web 20 సైట్ ఒకటి తయారు చేయాలి .. అన్ని వివరాలు (కారణాలు, నివారణ మార్గాలు) పొందు పరచాలి … దీనిలో ఒక్క బత్తీబంద్ మాత్రమే కాకుండా ఇలాంటివి ఎన్ని కార్యక్రమాలు అయితే గ్లోబల్ వార్మింగ్ నివారణకు తోడ్పడతాయో అన్నీ చెప్పాలి.. ఉతాహం ఉన్నవాళ్లు వాళ్లకు నచ్చిన కార్యక్రమానికి pledge తీసుకునే సౌకర్యం కల్పించాలి .. ఇలాంటి కార్యక్రమాలకు ముందు, తరువాత సాధ్యమైనంత ఎక్కువ వివరాలతో ఈ సైట్ ను అప్-డేట్ చేస్తూ ఉండాలి … డొనేషన్స్ ఇచ్చే, gift షాప్ లో వీటికి సంబంధించిన వస్తువులు కొనుక్కునే సౌకర్యం ఉండాలి … ప్రతి కాలనీ, పల్లె, నగరం, రాష్ట్రం, కాలేజి, ఆఫీస్, కర్మాగారం … ఇలా వీలైనంత వైవిధ్యమైన గ్రూప్స్ తయారు చేసుకుని, సభ్యులను చేర్చుకుని, వాళ్లకు నచ్చిన నివారణమార్గాలకు ప్రాచుర్యం కల్పించుకునే అవకాశం కల్పించాలి – ముఖ్యంగా ఏ కుటుంబాలు, కాలనీలు, పల్లెలు, నగరాలు, రాష్ట్రాలు మొదలగునవి(వారు) అయితే దీనికి ఎనలేని కృషి చేశారో, ప్రోత్సాహించారో ఇచ్చారో వారి(టి) గురించి ఎక్కువగా ప్రచారం చేయాలి – సాధించిన ప్రగతి, రాబోయే రోజుల్లో జరపబోయే కార్యక్రమాల గురించి SMS/Email subscription వివరాలను పొందటానికి అవకాశం కల్పించాలి – ఉన్న అన్ని నివారణ మార్గాలలో మంచివి ఎన్నుకోవటానికి Digg లాంటి suggestion/recommendation engine ఒకటి ఈ సైట్ లో పొందు పరచాలి.

Location / People based activities :

అందరికీ అన్నిచోట్ల ఒకే కార్యక్రమం అని చెప్పే/బలవంత పెట్టే బదులు మనం ఆయా ప్రాంత, జనాలను బట్టి, వాళ్ల అలవాట్లను బట్టి, చూ(చే)సే కార్యక్రమాలను బట్టి వారికి సరిపోయే లేదా తేలికగా ఆచరించగలిగిన వాటిని మొదటలో చెపితే నిదానంగా కొంచెం కష్టమైనవి ఉన్నా కూడా ఆచరించే అవకాశం ఎక్కువ ఉంది .. ఇలా ఏదో ఒక రోజు ఒక కార్యక్రమం అనే బదులు … ఒక వారం రోజుల పాటు లేదా ఒకే రోజు వివిధ కార్యక్రమాలు అనే విధంగా ఉండాలి … ఇదొక్కటే చెయ్యాలి అంటే ఇదొక్కటి నావల్ల కాదు అంటారు మనవాళ్లు … అలాగని కాకుండా ఎక్కువ ఛాయిస్ ఉంటే వాళ్లకి ఏది నచ్చితే లేక ఏది చెయ్యగలిగితే అదే చేస్తారు … వాళ్లకు కూడా స్వేచ్ఛ ఇచ్చినట్టు ఉంటుంది/అనిపిస్తుంది … అలాగే వాళ్లకి ఒకటికి మించి ఎక్కువ మార్గాలు చెప్పాము కాబట్టి ‘నో’ అని చెప్పకుండా ఏదో ఒకటి సెలక్ట్ చేసుకునే అవకాశం ఉంది .. ఇదేమీ తగలబడుతున్న ఇల్లు లేదా గడ్డివాము కాదు కదా … అందరూ ఒకేసారి తలా ఒక చెంబు నీళ్లు పోసి వెంటనే ఆర్పకపోతే చుట్టుపక్కల ఇళ్లన్నీ తగలబడతాయి అనుకోవటానికి … అలాంటప్పుడు ఈ మూకుమ్మడి కార్యక్రమాలకే ఎందుకు ప్రాధాన్యం ఇవ్వటం? ఒక్కసారి ఆలోచించండి … ఎవరంతట వారు .. ఎవరిళ్లల్లో వాళ్లు చేసుకునే కన్నా కలసి కట్టుగా చేస్తే మరికొంతమందికి మనం ప్రభావితం చేసినవాళ్లమవుతాము … అదీ పెద్ద ప్రయోజనం ఇక్కడ … దీని కోసం మాత్రం ఖచ్చితంగా ఎంకరేజ్ చేయాలి .. సందేహమే లేదు ..

అలాగే మన తెలుగు (మిగతా భాషల్లో కూడా ఇలానే ఉందిలేండి పరిస్థితి) టీ.వీ లలో వచ్చే ‘రోడ్’ మీద, ‘కాలనీ’ లలో, ‘కాలేజ్’ కాంపస్ లలో మొదలగు ప్రదేశాలలో జరిపే ‘రకరకాల’ కార్యక్రమాలను ఈ బత్తీ బంద్ పాటించే పల్లెల్లో, కాలనీలలో, కాలేజీల్లో ఏర్పాటు చేస్తే ఎంతో ఉపయోగంగా ఉంటుంది కదా .. అన్ని కుటుంబాలల్లో విద్యుత్ ఆదా .. అలాగే ఇదే టీ.వీ కార్యక్రమాలలో ఫోన్ కాల్స్ మీద ఆదారపడిన వాటిని ఆ కాలనీలో ఏదో ఒక ప్రదేశం/ఇంటిలో నుంచి మాత్రమే చేసుకునే అవకాశం ఉండేటట్టుగా చేసి, ఆ ఇంటినుంచే లైవ్ కవరేజ్ చేస్తే కూడా ఉపయోగంగానే ఉంటుంది…ఇలా చేస్తాము అంటే వద్దనే వారు ఎవరన్నా ఉంటారా … సెట్టింగ్ ఖర్చు కూడా ఉండదు 🙂

ఈ కార్యక్రమానికి హైదరాబాద్ మొత్తానికి ప్రత్యేక లేక అధిక మొత్తంలో పోలీస్ కాపలా అంటే వాళ్లు కూడా ఏమీ చెయ్యలేక పోవచ్చు .. అలాగని వాళ్లని తప్పు పట్టటానికి కూడా ఏమీ ఉండదు … అందుకే నగరాలలో (ఏదైనా ఒకటి లేక రెండు కాలనీలలో) ఇలాంటి కార్యక్రమాలు జరిపేటప్పుడు దొంగల బెడద లాంటిది లేకుండా ఏ కాలనీకి సంబంధించి ఆ కాలనీ వరకు ఔత్సాహవంతులైన యువకలను వినియోగించుకొని కొంతవరకు ప్రయోజనం పొందవచ్చు .. వారికి కూడా ఇలాంటివి కొత్తే కాబట్టి కొంచెం థ్రిల్లింగ్ గా కూడా ఉండే అవకాశం ఉంది .. తరువాతి రోజులలో వీరి గురించి నలుగురికీ తెలిసేలా (వీరికి ఇష్టమైతేనే సుమా) చేస్తే మరికొంత మంది ఇలాంటి కార్యక్రమాలలో పాలుపంచుకునే అవకాశం ఉంది. చెడు విషయాలకు సంబంధించి (ఉదా : ఈ దొంగతనాలు, అల్లర్లు మొదలగునవి) ఒక్కటి జరిగినా కుడా తరువాత మనం కాదు అని గ్యారెంటీ ఏమిటి అని ఆలోచించగలిగిన జనం, మంచి దగ్గరకు వచ్చేటప్పటికి ఆ ఒక్కరు/మొదటివారు వారే ఎందుకు కాకూడదు అని ఆలోచించరు … అది మానవుల ప్రస్తుత నైజం … దీని గురించి ఎక్కువ ఆలోచించి మన అసలు సమస్యనుంచి దృష్టి మరల్చుకునే బదులు వారిని ఆందోళనకు గురిచేయని లేదా సరైన సమాధానాలతోనే ముందుకు వెళదాం.

విషయం ఒకటే అయినప్పుడు అందుకు కృషి చేసే వాళ్లు/సంస్థలు కొన్ని వందల్లో ఉండటం తప్పులేదు అలాగే ఎవరికి తోచిన రీతిలో వాళ్లు ప్రయత్నించటంలో తప్పులేదు .. కాకపోతే ఇది ఒక రోజో, నెలో, 10 సంవత్సరాలలో పరిష్కారం అయ్యేలా అనిపించటం లేదు కనుక, వీళ్లందరిని, ఈ సంస్థలన్నింటినీ ఒకే త్రాటిపైకి తీసుకురావలసిన అవసరం ఉంది .. అలాగే ఇది ఈ ఉద్యమం మొదటిలో జరిగితే అంతకు మించి ప్రయోజనం ఉండబోదు.

ఈ కార్యక్రమాలలో తమ వంతు సాయం చేసే అందరికీ (ముఖ్యంగా కొంచెం ఎక్కువగా కృషి చేసేవారికి) ఎప్పుడో ఒకప్పుడు, ఏదో ఒక చోట వారి పేర్లు కూడా నలుగురికీ తెలిసేలా చేయండి .. ఎప్పుడు చూసినా/చదివినా ఆ పైన ఉన్న పది, పదిహేను మంది పేర్లు/ఫొటోలు మాత్రమే వచ్చేలా చేయకండి .. అవకాశం వచ్చినప్పుడల్లా కొంత మంది కొత్తవారిని పరిచయం చేసుకుంటూ, వారి గురించి నాలుగు మంచి ముక్కలు చెపుతూ ముందుకు సాగిపోండి. అలాగని అందరికీ అవకాశం ఇవ్వాలంటే కష్టమే అనుకోండి
ఒక్కరిగా, కుటుంబంగా :

ఈ రెండు దృష్టిలో పెట్టుకొని ఈ సమస్య గురించి ఆలోచిస్తే ముందుగా మనకి తోచేది … విద్యుత్ గృహోపకరణాలు వాడకం తగ్గించాలి, రాత్రి పడుకోబోయే సమయంలో ఆఫ్ చేసి పడుకోవాలి, కారు పక్కన పెట్టి బైక్ తీయాలి, దగ్గరలో ఉన్నవాటికి నడిచి వెళ్లాలి, నీళ్ల వాడకం తగ్గించాలి, ఇలా చాలా పెద్ద లిస్టే అవుతుంది … వీటి వలన ఖచ్చితంగా ఉపయోగం ఉంది .. సందేహమే లేదు … కాకపోతే ఇలా చేసిన వా(టి)రికి నేను ఇచ్చేది 3/10 అంతే … అలా కాకుండా వీటిలో ఏ ఒక్కదానికైనా మీరు ఇంకొకరిని ప్రభావితం చేసి వారిని కూడా ఆచరించేలా చేయగలిగిన వారికి 10/10. మీ స్నేహితులిద్దరూ చెరొక బైక్ మీద ఆఫీస్ కు రావటం కాదండీ ఇక్కడ కావలిసింది (ప్రయోజనం లేదని చెప్పటం నా ఉద్దేశ్యం కాదు సుమా) ఇద్దరూ కలిసి ఒకే బైక్ మీద రావటం … అదీ ఈ ఉద్యమానికి నిజమైన విజయమంటే.

ఇంట్లో నుంచి మీరు రెండు చెంబుల నీళ్లతో స్నానం చేసి బయటకు వస్తే ఇంటి బయట మీ శ్రీవారు ఇరవై బకెట్లతో తన కార్ వాష్ చేస్తూ కనబడటం … మీరు పడుకోబోయే ముందు ఓపికగా షట్ డౌన్ చేసి మీ ల్యాప్ టాప్ ను తెల్లారి ఆన్ చేస్తూ ఉంటే, మీ శ్రీమతి రాత్రి తన డెస్క్ టాప్ లో పెట్టిన ‘అత్తాకోడళ్ల కుస్తీ’ అనే తెలుగు ధారావాహిక 189 భాగాలు విజయవంతంగా డౌన్ లోడ్ అయ్యింది అని గెంతులేసుకుంటూ చెప్పటం … ఇవి నివారించగలిగితే ఈ కార్యక్రమానికి ఒక కుటుంబంగా మీ పాత్రకు నూటికి నూరు శాతం న్యాయం చేసినట్టే

మన రెండు చేతులతో మనం చప్పట్లు కొట్టి శబ్ధం సృష్టించటం బాగానే ఉంది, మంచిది కూడా .. కాకపోతే ఇక్కడ మనం చేయవలసింది మన రెండు చేతుల్లోకి మరో రెండు చేతులు కలుపుకోగలిగేలా ప్రయత్నించాలి .. ఆ రెండు కొత్త చేతుల్లోకి మరో రెండు ఇలా ఇది నిరంతరంగా, నిర్విఘ్నంగా సాగిపోయేలా మన ప్రతి అడుగూ/చేత ఉండేలా చూసుకోవాలి …

ఒకవేళ మీ శ్రీమతి/శ్రీవారు ఎంతో ఓ(నే)ర్పుతో ఈ గ్లోబల్ వార్మింగ్ నివారణకు తన వంతు కృషిలో భాగంగా చేసిన మా(చే)ర్పుల వలన మీ మేజర్ బిల్స్ లో తేడా కనిపిస్తే .. ఆ తేడాలో సొగం (అది $10 కావచ్చు అయినా కూడా) తనకు ఇవ్వండి. ఇంకా మీరు దయార్ద్రహృదయులు అయ్యుంటే అదే $10 ఇదే విషయంపై పనిచేస్తున్న స్వచ్చంద సంస్థకు విరాళంగా ఇవ్వండి .. ప్రతి నెలా కాకపోయిన కనీసం సంవత్సరంలో ఒక్కసారి అయినా .. It will make a lot of difference as a whole in a family and also to the society.

ముందు ఏదైనా మనం ఆచరిస్తే, మన ఇంటి నుంచి ప్రారంభిస్తే పక్క వాడికి చెప్పే అర్హతతో పాటు అందులోని సాధ్యాసాధ్యాలు, కష్టనష్టాలు, లాభాలు సులభంగా వివరించగలుగుతాం. కానీ అవతలివారికి వీటి గురించి తెలిసేదెలా మరియు మనం చెపుతున్న/ఆచరిస్తున్న నివారణా మార్గాలు నిజంగా ఫలితాలను అందిస్తున్నాయని అవతలి వారికి నమ్మకం కలిగించేదెలా … ఇండియా లాంటి దేశాలలో అవతలి వారిపై ఈ ‘నమ్మకం’ అనేదే చాలా వాటిల్లో ప్రాధాన్యత సంతరించుకుంటుంది కనుక దీనిని మనం అంత తేలికగా తీసుకోలేము(కూడదు కూడా) .. అందుకే కొంత మందివైనా లేక వాళ్ల అపార్ట్-మెంట్ మొత్తం యొక్క గ్యాస్/ఎలెక్ట్రిక్/పెట్రోల్ బిల్స్ కొన్ని నెలలవి చూపించేలా ప్రయత్నించాలి .. అలాగే కంపెనీలు, ఆఫీసులు, కర్మాగారాలు మొదలగునవి కూడా ఇలా చేసేలా ప్రోత్సహించాలి .. ఎప్పుడో ఒకప్పుడు ప్రభుత్వాలు కూడా ఇందులోకి దూకి తమ వంతు పాత్రగా పూర్తి వివరాలతో కూడిన ఈ statistics ను సామాన్య జనాలందరికీ అందుబాటులోకి తీసుకువస్తే అప్పుడు వారిలో పెరిగిన నమ్మకం ఈ కార్యక్రమాలను సాధ్యమైనంత వేగంగా విజయవంతమయ్యేలా చేస్తాయి..అలాగని అందరూ చెయ్యాలని అనుకోవటం అవివేకమే అవుతుంది … కొంత మంది, కొన్ని గ్రూపులు, కొన్ని సంస్థలు చేసినా చాలు

ఒక ఉద్యోగిగా, వినియోగదారుడిగా :

ఒక ఉద్యోగిగా, వినియోగదారుడిగా :

మీరు పని చేసే కంపెని, ఆఫీసు, ఫ్యాక్టరీ వాళ్లతో మాట్లాడి ఒప్పించి వాళ్లని దీనిలో భాగం చేయండి … అందులో పని చేసే ప్రతి ఒక్కరూ కంకణం కట్టుకొని ఎనర్జీ బిల్ లో తగ్గుదల చూపిస్తామని … సగం కంపెని వాళ్ళు ఉంచుకునేటట్టుగా మిగతా సగం ఏదైనా స్వఛ్ఛంద సంస్థకు విరాళంగా ఇచ్చేలా చేయండి .. కంపెని ఇలాంటి విషయాలని కొంచెం సీరియస్ గా తీసుకునేది అయితే వాళ్లకు మిగిలిన వాటా కూడా విరాళంగా ఇచ్చే అవకాశం ఉంటుంది … ఇలాంటి వాటివల్ల ఎక్కువ ఉపయోగం ఉంటుంది …

ఏ కంపెనీస్, షాప్స్, మాల్స్ మొదలగునవి అయితే ఈ గ్లోబల్ వార్మింగ్ నివారణకు తమ వంతు కృషి చేస్తున్నాయో అందరమూ వాటి యొక్క ప్రోడక్ట్స్ కొనటానికి ఒక ఓత్ లాగా తీసుకోవాలి .. అలా తీసుకుంటున్నామని నలుగురికీ ముఖ్యంగా ఆ కంపెనీస్/ప్స్/మాల్స్ కు తెలిసేలా చేయాలి తద్వారా మిగతా వారు లేదా వీరే ఇంకా ఎక్కువ యాక్టివ్ గా పార్టిసిపేట్ చేసేలా చేసినవారమవుతామేమో ..

ఉదా : ఏ వాషింగ్ మెషీన్ అయితే తక్కువ నీళ్లతో మంచిగా(compare to others) ఉతుకుందో అలాంటి వాటి గురించి పైన చెప్పిన సైట్ లో ప్రచారం చెయ్యాలి. అలాగే ఏదైనా సూపర్ మార్కెట్ లేదా వేరే షాప్ వాళ్లు ప్లాస్టిక్ బాగ్స్ కాకుండా పర్యావరణానికి హాని చేయని సంచులను ఇస్తుంటే అక్కడే మన నిత్యావసర వస్తువులను కొనాలి … వీళ్ల గురించి నలుగురికీ చెప్పాలి … అలాగే డ్వాక్రా మహిళా సంఘాలలో నుంచి వచ్చే ఉత్పత్తులలో కొన్ని అయినా ఇలాంటివి ఉండే అవకాశం ఉంది కదా వాళ్లకు/వాటికి కూడా ప్రచారం కల్పించాలి. అలాగే ఏదైనా కంపెనీ తక్కువ విద్యుత్ వాడే బల్బులను తయారు చేస్తూ ఈ పర్యావరణా రక్షణకు కృషి చేస్తుందో మనం వాటినే కొనటం .. మిగతా వాళ్లను కూడా ఇవే కొనేలా ప్రోత్సహించటం.

తెలుగు బ్లాగర్స్ గా :

ప్రతి మూడు/ఆరు/పన్నెండు నెలల కొకసారి ఒక రెండురోజుల(వీకెండ్) పాటు మన తెలుగు బ్లాగ్ ఎగ్రిగేటర్స్ అయిన కూడలి, తేనెగూడు, జల్లెడ మొదలగు వాటిని షట్-డౌన్ చేయండి … అదే సమయంలో మన సొంత బ్లాగులను కూడా అదే రోజులలో ఎవరికీ అందుబాటులో లేకుండా చేద్దాం ie making them private….అలాగే తెలుగు బ్లాగర్స్ అందరూ కలసికట్టుగా సంవత్సరంలో కొన్ని రోజులో లేక ఒక వారమో ఎలాంటి టపాలు ప్రచురించకుండా నిర్ణయం తీసుకోండి లేదా గత కొన్ని నెలలుగా మీ బ్లాగుల్లో రాసిన సగటు టపాల సంఖ్యను తెలుసుకుని, రాబోయే నెలలో దానిలో సగం మాత్రమే అంటే మీకు అత్యంత ఇష్టమైన విషయాలపై మాత్రమే రాయండి.

అన్నిటికన్నా ముఖ్యమైనది:

అలాగే ఈ కార్యక్రమాల అమలు మరియు వాటి ఫలితాలు అనేవి ఉపవాసం మరుసటి రోజు తిండిలా అంటే .. ముందు రోజుది ఈ రోజుది కలిపి మొత్తం ఒక రోజే తినెయ్యటం లాగా ఉండకూడదు … అలా కాకుండా ఉన్నాయి అని చెప్పటానికి ఆధారాలు, అలా కాకుండా చేసేటందుకు ఉన్న మార్గాలు మనం సామాన్య జనానికి అందుబాటులో ఉంచేలా ప్రణాళికలు సిధ్ధం చేసుకోవాలి లేదా కనీసం సిధ్ధం చేసుకోవటానికి సమాయత్తం అవుతున్నామన్న భావన/నమ్మకం ఏ జనాలు అయితే మనల్ని నమ్మి మనం చెప్పిన వాటిని ఆచరణలో పెట్టారో వాళ్లల్లో కలగజేయాలి …

ప్రచారం :

ఇలాంటి విషయాలపై జనాలలో అవగాహనను కలిగించాలి అంటే సీరియస్ గానో లేక అంతా టెక్నికల్ గానో చెప్పటానికి అసలు ప్రయత్నం చేయకూడదు … దీని గురించి మాట్లాడేవాళ్లు, ప్రచారం కల్పించేవాళ్లు వీటిని అర్ధం చేసుకుంటే చాలు అంతే గానీ వీరు చెప్పేది వినటానికి దొరికిన వాళ్లను కూడా వీరి స్థాయిలో ఎడ్యుకేట్ చేయటానికి ప్రయత్నించటం మంచిది కాదు …

ఎయిడ్స్ గురించి మన ఆంధ్రప్రదేశ్ లో వచ్చిన ‘పులిరాజా’ ప్రకటన ఎంతటి సెన్సేషన్ క్రియేట్ చేసిందో గుర్తుండే ఉంటుంది కదా …

వివిధ రకాల నివారణ మార్గాలపై .. సాధ్యమైనన్ని వైవిధ్యమైన కార్టూన్స్, కవితలు, వీడియో-ఆడియోలు, ప్రకటనలు, కొటేషన్స్, పాటలు, పజిల్స్, గేమ్స్(http://www.powerupthegame.org/), క్విజ్ ప్రోగ్రామ్స్ మొదలగునవి తయారు చేసి వీటికి విస్కృతమైన ప్రచారం కల్పించాలి … ఇక్కడ గుర్తుంచుకోవలసిన ముఖ్య విషయం ఏమిటంటే ఒకే దానిలో అంతా చెప్పకుండా ఉండేలా జాగ్రత్తలు తీసుకోవటం.

అసలు ఈ గ్లోబల్ వార్మింగ్ అనే ప్రక్రియకు కారణాలు మరియు నివారణా మార్గాలన్నింటినీ సంపూర్తిగా సేకరించి వాటిని అందరికీ అర్ధమయ్యే రీతిలో సాధ్యమైనంత చిన్న వాక్యాలలోకి కుదించి ఒక చిన్న డేటాబేస్ లా తయారు చేయాలి .. అప్పుడు వాటిని ‘రోజు/వారానికో తెలుగు పదం’ లా లేక ‘A quotation a day’ లా వీలైనన్ని సైట్స్, ఫోరమ్స్ మరియు బ్లాగుల్లో విడ్జెట్/ఇమేజ్ రూపంలో చూపించే అవకాశం కల్పించాలి.

అలాగే గూగుల్ వారు కనిపెట్టిన దీని చూడండి/ఆచరించేలా ప్రోత్సహించండి.

[ మా భాష నాశనం అయిపోతుంది .. అర్ధం కానంతగా మార్పులకు లోనవుతుంది అని బాధ పడేవాళ్లు ఉంటారు .. ఎవరి ప్రాధామ్యాలను బట్టి వారు ఎవరికి తోచిన సైడ్ వాళ్లు తీసుకోవటంలో తప్పేమీ లేదు ]
every character (byte) we send in a message results in about 0.0000000000000000034 metric tons* of CO2 being released into the atmosphere!

For example, if we want to say:
As far as I’m concerned, you can give me the twenty dollars you owe me when I see you later.

You could save more than 50% in wasted characters by saying:
AFAIC, U can gve me the 20 $$ YOM whn I CUL8R.

చివరిగా :

Take a look at how fast the companies in USA try to adopt and/or jump in to this kind of programs : For ex: IBM and Google.

IBM : http://www.ibm.com/ibm/green/
Google : http://www.google.com/corporate/green/energy/

If you have info on Indian companies and the campiagns under taken by them, please share it with the rest of us here.

వీళ్లెవరో గానీ ఏదో చేస్తున్నారు మొత్తానికి ఇదే విషయంపై .. కాకపోతే దీని గురించి మనకి అసలు ఏమీ అర్ధం కాలేదు గానీ ఏదో బాగానే చేస్తున్నారు అనిపించింది :

http://www.cdproject.net/index.asp

దీంట్లో మన ఇండియా పార్టిసిపేషన్ కూడా ఉంది చూడండి :

http://www.cdproject.net/partnerindia.asp

నేను సైతం పాటించేందుకు “నెటిజన” సూత్రాలు

మన సమాజంలోని విపరీతపు పోకడలను గమనిస్తూ, చురుకైన వ్యాఖ్యలతో మనల్ని అప్రమత్తంగా ఉంచడానికి నెటిజెన్ గారి బ్లాగు మారు పేరు. ఇక్కడ బత్తీబంద్ సందర్భంగా జరుగుతున్న సందోహానికి ప్రేరేపితులై .. తన పరిశోధనల్లో తెలుసుకున్న విషయాల్ని మనతో పంచుకుంటున్నారు. ప్రతి ఒక్కరమూ “నేను సైతం” అని భూతాప నివారణకి మనవంతు ఏం చెయ్యగలమో సూచనలిస్తున్నారు.
*** *** ***

  • ఫ్రిడ్జ్‌లోంచి తీసి వెమ్మటే స్టవ్ మీద పెట్టడంకంటే ఒక రెండూ నిముషాలు బయటి వాతవరణంలోని శీతోష్ణస్థితికి వచ్చింతరువాత వేడి చేసుకోవడం వలన కొంత ఇంధనం అదావుతుంది.
  • భానుడి ప్రతాపం కొంచెం ఎక్కువ ఉన్న రోజులలో ఒవెర్‌హెడ్ టాంకులో నీళ్ళు వేడిగానే ఉంటాయి. వాటితోనే స్నానాలు చెయ్యవచ్చు. మరిగే నిళ్ళు అఖర్లేదు. .
  • ద్విచక్రవాహనం మీద కూర్చుని కిక్ స్తార్ట్ చేసి బండిని వెనక్కి ముందుకి తిప్పడంకంటే, మనకి కావలిసిన దారిలోకి బండిని పెట్టుకుని ఈంజిని స్టార్ట్ చెయ్యడం మూలంగా కొంత ఇంధనాన్ని అదా చేసుకోవచ్చు.
  • సిగ్నల్స్ దగ్గిర కూడా ఎర్ర లైటు పడేదాకా, ఇంజన్ని ఆపేసి కూడ కొంత ఇంధనాన్ని అదా జేసుకోవడమే కాదు, కాలుష్యాన్ని తగ్గించినవారు కూడా అవుతారు.
  • అవకాశం ఉన్నప్పుడు తోటివారితో కలిసి షాపింగ్‌కి మీ వాహనంతో వెళ్ళడం ద్వారా “నేను సైతం” లెవల్లో ఇంకొకరికి సహయం చేసాను అని మన భుజం మనం చరుచుకోవచ్చు.
  • రోడ్డు మీద చెట్లు నాటి వాటిని పెద్దవయ్యేదాకా చూడగలిగితే సంతోషమే. అలా కాని పరిస్థితులఓ చిన్న చిన్న కుండీలలో మీ ఇంట్లోనే చిన్న మొక్కలు పెంచడం ద్వారా కూడా భూ తాపాన్ని తగ్గించడానికి మీరు సహాయం చేసిన వారవుతారు.
  • స్వంత ఇళ్ళు కట్టుకునేటప్పుడు eco-friendly సరుకు సరంజామతో ఇల్లు కట్టుకోవచ్చు. ఎత్తైన సీలింగ్స్ మూలంగా ఇల్లు చల్లగావుంటుంది. ఆ మేరకు ఏ.సీ / ఫాన్ వాడకం తగ్గుతుంది.
  • విశాలమైన కిటికీలు బిగించడంవల్ల వెలుతురు ఉంటుంది. లైట్ల వాడకం తగ్గుతుంది.
  • “వాటర్ హార్వెస్టింగ్” సూత్రాలు అనుసరించడంవల్ల భూతాపాన్ని మీరు అరికట్టి వారవుతారు.
  • ఈ eco-friendly ఇళ్ళ వివరాలకు – Laurie Baker (లారి బేకరి) ని చూడండి.
  • పైన వెప్పినవాని కూడా “డబ్బు ” ని అదా చేసేవే. ఆ డబ్బు మీ దగ్గిరే ఉంటుంది. అదే మీకు లాభం.
  • ఇవన్ని కా్కుండా మీరు ఇంకొక పని కూడా చెయ్యవచ్చు — కనీసం ఇంకొక ఇద్దర్ని ఈ విషయంలో చైతన్యవంతులని చేసి, కనీసం ఒక్ఖ సూ్త్రానైనా పాటింప చేస్తే మీరు నిజంగా ఛాంపియనే!

సిద్ధా, బుద్ధా మరియూ బత్తీబంధా!

తెలుగు బ్లాగ్లోకంలో ఎదురు లేని కామెడీ కింగు విహారి. అది నేనిచ్చిన బిరుదు కాదు, బ్లాగ్లోక వాసులే ఎప్పుడో ఆ పట్టం కట్టేశారు. ఈ మధ్యన చాలా మంది మంచి కామెడీలూ, సెటైరులూ రాస్తున్నా, ఎక్కడా అపశ్రుతి దొర్లకుండా, ఎప్పుడూ క్వాలిటీ తగ్గకుండా అనేక రాజకీయ సామాజిక సాంస్కృతిక విషయాల మీద వ్యాఖ్యా బాణాలూ, వ్యంగ్యాస్త్రాలూ, సెటైరు ఆటం బాంబులూ కురిపిస్తూ పాఠకులకి నవ్వుల పూలగుత్తులు అందించే విహారి దృష్టి ఈసారి బత్తీ బందు సమస్య మీదకి పాకింది.
*** *** ***
“అయ్యగారూ! ఏంటీ బత్తి బంద్?”

“దీపాలు ఆర్పి వుంచడం. దీపాలొకటే కాదు విద్యుత్తును వాడే ఏ సాధనాన్నయినా వాడకపోవటం. అది టి.వి కావచ్చు, ఫ్రిజ్ కావచ్చు, ఏ.సి. కావచ్చు. విద్యుత్తుతో నడిచే ఏ యంత్రాన్నైనా వాడకపోవటం. ”

“ఏంత సేపు? ”

“ఓ గంట సేపు. ”

“ఆర్పితే ఏమవుతుందట? నేనొక్కర్ని చేస్తే సరిపోతుందా? అసలెందుకు ఆర్పాలంట? ”

“ఆర్పితే ఎనర్జీ ఆదా అవుతుంది. ప్రపంచ వ్యాప్తంగాఎ ఎన్నో చోట్ల ఎంతో మంది ఈ బత్తి బంద్ కార్యక్రమంలో పాలు పంచుకున్నారు ఇంకా పాలు పంచుకుంటున్నారు. నువ్వు కూడా ఈ చారిత్రాత్మక ఘట్టం లో చేయి కలిపితే బావుంటుంది. ఏన్నో లక్షల మంది చేస్తున్న మంచి పని ఇది. దీనికి ఎంతో ప్రచారం అవసరం. ”

“అయ్య గారో నాకో భేషైన అవిడియా వచ్చింది. ”

“ముందు చెప్పు తరువాత అది భేషో ట్ర్యాషో చెబుతా. ”

“ఏ పనైనా విజయవంతం కావాలంటే మంచి పబ్లిసిటీ కావాలి కదా”

“అవును గాంధీ ఉప్పు సత్యాగ్రహం కూడా నోటి మాటతో మంచి ఊపందుకుంది. ”

“ఇప్పుడు ఇలా చెప్పగానే అలా చేసెయ్యడానికి గాంధీలు లేరు, అనుచరులు లేరు కదా అందుకనే ఎవరైనా సెలెబ్రిటీని పట్టుకొచ్చి ప్రచారం చేయిస్తే అందరికీ గుర్తుంటుంది. ”

“దశావతారం ఆడియోకు పది కోట్లిచ్చి జాకీ చాన్ ను తెచ్చినట్టు ఇప్పుడు టాం హ్యాంక్సునో, జాన్ ట్రవోల్టానో తెప్పించమంటావేంటి. ”

“మీ కెప్పుడూ వేళా కోళమే. అంత పెద్దోళ్ళను భరించే శక్తి వాళ్ళకుందేమోకానీ, ఈ ధరిత్రి కోసం పాటు పడే ఇలాంటి ప్రచారకులకు లేదు.

“సో ఏం చెయ్యమంటావ్? ”

“నాకు కొంచెం ధారి ఖర్చులకు ఇస్తే నేను కొంత మందితో పెద్దోళ్ళతో మాట్లాడి వాళ్ళను ఇందులో పాల్గొనమని అడిగి వస్తా. అప్పుడు దీనికి భారీ ప్రచారం వస్తుంది. ”

“నిజంగానే భేషైన అవిడియా. సరే కానీ. రేపే బయలు దేరు. ”
******

“వై.ఎస్. గారూ నమస్కారమండీ”

“ఆ.. ఆ… సిద్ధా నువ్వా? రా… రా… ఏవిటి ఇలా వచ్చావ్. మీ బుధ్ధ నా దగ్గర్నుండి ఏవైనా కాన్సెప్టు కోసం పంపించాడా? ”

“అబ్బే మీరు మైకు పట్టుకుని రెండు మాటలు మాట్లాడితే అదే మాకు పెద్ద కాన్సెప్టు. నేను దాని కోసం రాలేదు. ”

“మరి దేనికొచ్చావో చెప్పు.”

“ఏమీ లేదండీ! మీరు జూన్ 15 తేదీన ఓ గంట సేపు లేట్లార్పేయాలండి. ”

“లేట్లార్పేసి కొవ్వొత్తులు వెలిగించుకోవాలా? ”

“అవునండి.”

“అదెంత పని అసలే ఉప ఎన్నికల్లో గెలిచినందుకు నేను హ్యాప్పీ. మేడం కూడా హ్యాప్పీ.. ఆ రోజు క్యెండిల్ లైట్ డిన్నర్ చేసుకుంటా. సూరీడూ?.. సూరీడూ? … ఎక్కడున్నావయ్యా ఇలా రా. ”

“చెప్పన్నా”

“ఇదిగో సిధ్ధా ఏదో చెబుతున్నాడు మన కేలండర్ లో ఆ రోజు గుర్తుపెట్టుకొని లైట్లూ, టి.వి.లు అన్నీ ఆర్పెయ్. ”

“అలాగే అన్నా. ”

“సిధ్ధా. నీకు ఓకేనా. ”

“చాలా మంచిదండి. అలాగే మీరు ఈ విషయం సాక్షిలో వచ్చేట్టు చెయ్యండి. ఇంకా బొత్సా కు, ఎమ్మెస్ కు చెప్పే బాధ్యత కూడా మీదే. మారెప్పకు మాత్రం చెప్పకండి. ”

“సాక్షి వరకు ఈజీ పనే. కావాలంటే మనకనుకూలంగా వున్న హరీష్ రావ్కి చెప్పమంటే చెబుతా. మిగతా పనే కష్టం. ”

“అయితే ఒద్దు లెండి. సాక్షి లో వచ్చేట్టు చెయ్యండి. మీరు మారెప్పకు చెబితే ప్రతి రోజూ బత్తి బంద్ అంటాడు. ”
****

“చంద్ర బాబు గారు! నమస్కారమండి. ”

“నమస్కారం. ప్రజలు మా పక్షాన వున్నారు. చూశారా ఉప ఎన్నికల్లో మా ప్రతాపం. వచ్చేది మా ప్రభుత్వమే. నో డౌట్ అబౌట్ ఇట్. ”

“అవచ్చేమో. మీరు అలా రెండు వేళ్ళూ పెట్టి నా కళ్ళలో పొడిచెయ్యకండి. నాకున్నవి రెండు కళ్ళే”

“సరే .. సరే.. ‘మీ కోసం’ కోసం మాట్లాడి మాట్లాడి ఇలా అయిపోయా. విషయం చెప్పండి. ”

“మీరు మీ కోసం అన్నారు కదా. అలాగే మా కోసం ఓ పని చేసి పెట్టండి. ”

“ఏమి చెయ్యాలి? నేను ముఖ్యమంత్రయ్యాక ఏదడిగితే అది చేసి పెడతా. ”

“అయిన తరువాత చూద్దాం కానీ. ఇప్పుడు మాత్రం మీరు ఓ గంట పాటు కరంటు వాడకూడదు. ”

“ఏఁ నేనెక్కడికెళితే అక్కడ కరంటు పీకేస్తున్నారు కదా. మళ్ళీ నేను పీకడమెందుకు. ”

“అది కాదు బత్తీ బందు కోసం జూన్ 15 న ఓ గంట పాటు దీపాలార్పితే బావుండు నని. ”

“ఓస్ అదెంత సేపు. హరికృష్ణా?…హరికృష్ణా?.. ”

“ఏం బావా? ”

“జూన్ 15 తేదీ సాయంత్రం ఏడున్నర గంటలకు పులివెందుల్లో మీ కోసం ప్రోగ్రాం వుండేట్టు చూడు. అక్కడయితే చాలా కరంటు ఆదా అవుతుంది. అక్కడ చాలా ఇళ్ళకు ఏ.సి. వుందట. ”

“అలాగే బావా. జూను 15…. నేనెవ్వరి బల్బూ చూడను. ”

“సిధ్ధా! ఇంకా ఏమన్నా కావాలా? ”

“చాలండి. మీరు ఆ రెండు వేళ్ళు కిందకనుకుంటే నే వెళ్ళొస్తా. ”
***

“చిరంజీవి గారూ! నమస్కారమండి”

“అరే సిధ్దా. నువ్వేమిటి ఇక్కడ. నమస్తే అనకుండా నమస్కారం అని అచ్చ తెనుగులో అంటున్నావ్. ఏంటి నేను పెట్టబోయే పార్టీ టికెట్టు కానీ కావాలా. నో ప్రాబ్లెం. వెళ్ళి బావ అరవిందు ముఖారవిందాన్ని ప్రసన్నం చేసుకో. ”

“అబ్బే నాకన్ని ఆసలు లేవండీ. మీరు బ్లడ్డు బ్యాంకూ, కన్ను బ్యాంకూ పెట్టారు గదా. అలాంటి సేవే ఒకటి ఇప్పుడు చేయాలండి.

“ఓస్ అంతేనా. తమ్ముడు నాగ బాబును రమ్మని చెప్పనా. ”

“ఒద్దండి. ఆపద మొక్కుల వాడు సినిమా చూసేశా. ఇప్పుడు మీరు ఒ గంట పాటు కరంటు వాడకుండా వుండాలండి. ఆదీ జూను 15 న. మీ మెగా అభిమానులందరికీ కూడా చెప్పాలండి. ”

“తప్పకుండా తమ్ముడూ. అదెంత పని నా అభిమానులున్నదే సమాజ సేవ చెయ్యడానికి. నేనున్నది ప్రజా సేవ చెయ్యడానికి. తప్పకుండా చేస్తా. ఇప్పుడే మా ఆంధ్రజ్యోతి వాళ్ళను, టి.వి.9 వాళ్ళను పిలిచి ఓ ప్రకటన కూడా ఇస్తా. ఎందుకైనా మంచిది అరవిందును ఓ సారి కలిసి పో. ”

“నేను మంచి రైల్లోనే వచ్చానండి. ఆయన దగ్గరికెళ్తే రైలెక్కమంటాడు. ఆదెక్కితే నాకు స్టాండిగే గతి. నే వెళ్ళొస్తా. ”

“వెళ్ళిరా. మళ్ళీ ఆగస్టు 15న తప్పకుండా రా.”
***

“కేసీఆరన్న వుండాడా? ”

“ఏఁ ఎందుకు. అన్న మాకే మొఖం చూపిస్తలే నువ్వెవడ్బే. బయటికి బో. ”

“లేదన్నా కొంచెం బత్తీ బందు గురించి చెబుదామని. ”

“చల్..నోర్మూసుకుని బో. ఇప్పుడు అన్నకు అందరూ అగర్ బత్తిలు ఎలిగించి పెడ్తుండ్రు. వాటిని ఆర్పేస్తావా. చల్. ”

*******************

నిరంజనోపాఖ్యానం

దంచెద ఊక యని ఢంకా బజాయించి మరీ బ్లాగ్ప్రవేశం చేసిన ఊకదంపుడు, అటు ఛందోబద్ధ కవిత్వాన్నీ, ఇటు మందుబాబు తూగులయ్య పదాల్నీ, సరే ఇహ ఇంగ్లీషు యు లివ్ లాంగా అంటూ పైనా కిందా ఎడాపెడా వాయించే ఈ పెద్దమనిషికి మొన్నొకరోజున ఊహించని ఎదురు దెబ్బ తగిలిందిట.
*** *** ***
గత వారాంతం లో అనుకోకుండా నిరంజన్ దగ్గరకి వెళ్లాను. వాడిది నాది పదిహేనేళ్ల స్నేహం.
కాలేజీ లో చేరిన కొత్తల్లో పరిచయం, ఇద్దరం ఒకే క్లాసు, తనూ నాలాగే రూం వెతుక్కుంటున్నాడు, మొత్తానికి మాయాబజార్ లో ఓ పోర్షను దొరికితే, ఇద్దరం కలిసి ఉండాలని తీర్మానించుకొని అద్దెకి దిగాం.

చేరిన పదిరోజులకనుకుంటా , ఓ ఆదివారం నాడు పొద్దున పదింటికి నిద్రలేవగానే,
ఏంటి రాత్రి లైటాపకుండానే పడుకున్నావ్? అన్నాడు..
చాలాసేపు ఏదో చదువుతున్నాను, అలానే నాకు తెలియకుండా నిద్రపోయాను అన్నాను..
ఆదే రోజు సాయంత్రం, వాడు ఎక్కడికో వెళ్ళాడు, వాడు అడుగు బయట పెట్టీపెట్టగానే కరంటు పోయింది.కాసేపటికి ఏమిచేయాలో తెలియక నేను సినిమాకెళ్ళాను.
తిరిగి వచ్చిన తరువాత వాడు అడిగిన మొదటి ప్రశ్న:
లైటార్పేయకుండా బయటకు వెళ్లావ్?
కరంటు పోయినప్పుడు బయటకు వెళ్ళాను, అనుకోకుండా అటునుంచి సినిమాకి వెళ్ళాను అన్నాను
నీకు డబ్బులెక్కువైతే కరన్సీ తగలెట్టు కానీ కరంటు తగలబెట్టద్దు అన్నాడు.

కరంటు షాకు కొట్టినట్టైంది…

ఇంకో సారి, సందర్భం గుర్తు లేదు, ఎదో బేరం అనుకుంటాను, కొట్టువాడు, ౧౦ రూపాయలు చెప్పిన వస్తువు, కాసేపు బేరం జరిగిన తరువాత వీడు తొమ్మిది రూపాయలకు అడిగాడు..
రూపాయిమాత్రానికి ఏముంది తీసుకో అన్నాను…
విసా విసా బయటకు వచ్చేసాడు..

రోడ్డుపైకొచ్చిన వచ్చినతరువాత,
౯ రూపాయలు ౧౦ రూపయలు అవ్వాలంటే బాంకులో ఓ సంవత్సరం పాటు నిల్వ ఉంచాలి తెలుసా అన్నాడు.. తొమ్మిది రూపాలకు నేను కొనదల్చుకున్న వస్తువు పదిరూపాయలు కొమ్టున్నాను అంటే పదకొండు శాతం ఎక్కువ ఖర్చు పెడుతున్నాను అని అర్ధం, ఇవాళ బ్యాంకు వడ్డీ కూడా అంతలేదు అన్నాడు.

ఇంత క్రమశిక్షణ ఇంత కచ్చితత్వమూ, ఉన్న నిక్కచ్చి మనిషితో రూమ్మేట్ గా ఉండటం నా వల్లకాదని ౩ నెలలకల్ల తెలిసిపోయింది.మెల్లగా మకాం మార్చాను. ఐతే మాసవారి పరీక్షలు, అసైన్‍మెంట్లు, ఆఖరివారపు ఆర్ధికకటకట ఇత్యాది నా అవసరాలవల్ల ‘స్నేహం’ మాత్రం బానే నడిచింది.

డిగ్రీ అయిన తరువాత కలపలేదు, అమెరికా వెళ్ళి ఓ పుష్కరం ఉండీ పుష్కలంగా సంపాదిచ్చుకొని ఈ మధ్యనే స్వదేశం లో స్థిరపడదామని వచ్చాడు. ఇప్పుడు పదిహేనుయేళ్ల తరువాత మళ్లీవాడిని కలవటానికి వాళ్లింటికి వెళ్ళాను. నిజానికి నాకు వెళ్ళాలని అంత ఆసక్తి కానీ లేదు వాడి భార్య, నా భార్యస్నేహితురాలవటంచేత, ఆవిడ గత పదిరోజులలో చాలమార్లు ఈమెకి ఫొన్ చేసి రమ్మంటం వల్ల, ఈవిడ ఇవాళ వస్తున్నట్టు చెప్పటం వల్ల తప్పలేదు.
నే వెళ్లేసరికి ఏడుముప్పావయ్యింది. విశాలమైన టౌన్‍షిప్పులో ఆఫీస్ వాళ్లిచ్చిన ఫ్లాట్ లో ఉంటున్నాడు. వాడి ఫ్లాట్ ఎంట్రన్స్ దగ్గరకి వెళ్లేసరికి అంతా చీకటి. తలుపు తీసే ఉండటం తో అరే నిరంజన్ అని పిలిచాను.
పిలిచిన వెంటనే వచ్చాడు ఓ కొవ్వొత్తి పట్టుకొని..

ఎంట్రా నీ ఒక్కఫ్లాట్ లోనే కరంటు పోయినట్టుంది అంటూ లోపలికి వెళ్లాను..
కాసేపాగి వస్తుందిలే అని అంటుండగా వాళ్లవిడ పెద్దకొవ్వొత్తి తెచ్చి టీపాయి మీద పెట్టి, నాకో నమస్కారం పెట్టి మా అవిడని,పిల్లవాడిని తనతో లోపలికి తీసుకువెళ్లింది.

సోఫాలో కూర్చుంటూ మీ ఒక్కఫ్లాట్లోనే కరంటుపోయిందేమిటిరా అన్నాను.

ఇప్పుడే వస్తుందిలే కూర్చోరా, సంగతులు చెప్పు ఎట్టా ఉన్నావ్ అన్నాడు.
బానే ఉన్నారా.. ఐనా ఎమర్జెన్సీ లైటన్నా లేకుండా ఈ కాండిల్స్ ఏమిటిరా అన్నాను?
కరంటు పోలేదు రా నేనే అన్ని లైట్లూ ఆపేశాను అన్నాడు..
అపేశావా ఎందుకు
గ్లోబల్ వార్మింగ్ రా అన్నాడు…
అప్పుడెప్పుడే ఆయిల్‍పుల్లింగ్ చుట్టుకున్నట్టు ఈ అంటువ్యాధి నీకూ బట్టుకుందా అన్నాను..ఓ వంకర నవ్వుతో…
అవును అన్నాడు…
ఐనా ఆ టీవీ వాళ్లదయ వల్ల మొన్నే అయిపోయిందిగా, ఇంకా ఇప్పుడేమిటీ అన్నాను

టీవీ వాళ్లు ఆ రోజు మాత్రమే చేశారేమో, నేను రోజూ చేస్తూనే ఉన్నాను అన్నాడు…
బాబ్బాబూ మా అబ్బాయి భయపడతాడు .. లైట్లు వెయ్యరా…
వాడు ఎక్కడ భయపడతాడో అని నువ్వు భయపడక వాడు చక్కగా ఆడుకుంటున్నాడు అన్నాడు..
లోపలికి తొంగి చూశాను, అద్దరు ఆడవాళ్లు తమ బడి ముచ్చట్లలో, ఇద్దరు పిల్లలూ ఆటలలో ఉన్నారు..
నాకు ఏమి చెయ్యాలో తెలియలేదు..
పోనీ అలా బయటకు వెళ్ళి లైటులో కూర్చొని మాట్లాడుకుందాం రారా అన్నాను..

నేను కావాలని చీకటిని కోరుకొని, లైట్లు ఆర్పేశాను రా.. నా ఇంట్లో ఆపేసి వెరే లైటు దగ్గరో , జనరేటర్ వాడాటానికో, షాపింగ్‍మాల్‍కివెళ్ళటానికో కాదు అన్నాడు.

అసలు నువ్వు ఓ గంట ఆపెయ్యటం వల్ల ఏమైనా లాభం ఉందా?
ఉంది. ఓ గంటపాటు భూతాపానికి నా పాపం జోడించటంలేదు… …
ఓ గంట, దానివల్ల ఏమిటి ఉపయోగం..
ఈ గంట ఆపివేసి కూర్చోవటం వల్ల, నేను – ఈ భూతాప సమస్యని రోజంతా నేను మర్చిపోను..
అందువల్ల ఒరిగేదేముందిట?
అందువల్ల నా జీవనవిధానం లో నే మార్పువచ్చింది…
ఏమిటో..

కాంటీన్ కో లైబ్రరీకో వెళ్లినపుడు నాకోసం ప్రత్యేకం లైటు, ఫాను వేసుకోకుండా అవి ఉన్న చోట ఇతరులతో పాటే కూర్చోవటం.బండిని పదే పదే బయటికి తీయకుండా.. బండి మీద వెళ్ళాల్సిన పనులన్నీ రోజుకి ఒకేసారి చేయటం..

నీ పిసినారి తననానికి పెద్ద పెద్ద పేర్లు ఎందుకు పెడతావ్ చెప్పు…

కరంటు విషయం లో నాది పినిసిగొట్టు అనటం అవివేకం.. కాలేజీ రోజుల్లో ఊళ్లలో రోజుకి పది గంటలుదాక కరంటు కోత ఉండేది.. పంటలకుఉ నీళ్లు పెట్టుకోలేక రైతులు అల్లాడేవారు.. నీబొటి వాళ్లేమో కరంటు ను దుబారా చేసావారు… ఇప్పుడు అదే పరిస్థితి తోడు ఈ గ్లోబల్ వార్మింగు కూడాను..

నా దగ్గర డబ్బులున్నాయి నేను దుబారా చేస్తాను….

నీ డబ్బులని నువ్వు దుబారా చేసుకో, కానీ, భూమి, నీరు, విద్యుత్ శక్తి.. ఇవి జాతీయ వనరులు… మన భారతదేశం లో నీటీ కొరత , విద్యుత్ శక్తి కొరత ఎంతవుందో తెలియకుండా ,ఈ రెంటీనీ దుబారా చేశావాడు సంఘ ద్రోహే నాదృష్టిలో.
డబ్బు దుబారా సేస్తే తిరిగి సంపాదింకుంటావేమో ,ఇవి ఓ సారి ఖర్చు సేసిన తరువాత దక్కనుకూడా దక్కవు.
ఎందుకు దక్కవు డబ్బులుపడేస్తే దక్కుతాయి…
వందేళ్ల క్రితం భాగ్యనగరానికి ఆనుకొని ‘మూసీ’ అనే మంచినీటి నది ఉంది…ఆ నదిని మళ్లీ తీసుకురావటానికి ఎన్ని డబ్బులు పడేస్తావ్?
….
రాయలసీమ ఎడారిగా మారకుండా ఉండటానికి ఎన్నిడబ్బులు విసిరేస్తావ్?
అవన్నీ గవర్నమెంటు చూడాలిరా..
గవర్నమెంటు చూడాలి.. చూడాకపొతే వాళ్లని ఐదేళ్ల తరువాత దింపేయాలి.. ఇంకోపనికిమాలిన వాళ్లని ఎక్కించాలి.. అంతే గాని ఇంకేంచేయనంటావ్…
చస్… చేయకపోవటం ఎందిరహే.. హాపీ గా చేశావాడిని.. మా తాతయ్య వందెకరం జల్సాలకి తగలెట్టాడు.. లేకపోతే.. అందులో హాపీగా పంటలుపండిచ్చుకుంటూ మా ఊళ్లో కాలుష్యం లేని చోట హాపీగా బతికి,.. మీ ఆహారకొరతకూడా తీర్చేవాడిని…
మీ తాతయ్య నీకన్నాచాలామంచి వాడు తెలుసా..
పేకాటికి, తిరుగుళ్లకి తగలేసి కొడుకులకి మనవళ్లకి డబ్బులు లేకుండా జేసినవాడు మంచోడారా నీకు?…
ఆయన డబ్బులు లేకుండా చేశాడేమో గానీ, మంచినీరు, మంచి గాలీ.. ఇచ్చాడు.. భూమి మీద మనుషులు నివసించలేని పరిస్థితి కల్పించలేదు…
కానీ ఇవాళ నీ జీవన విధానం వల్ల… రెండు తరలా తరువాత … మంచినీళ్లకి పెట్రోలుకన్నా కష్టపడాలిసివస్తే, ఇవాళ మంచి నీళ్లు కొనుక్కుంటునట్టు మంచి గాలి కూడా కొనుక్కోవాల్సి వస్తే.. నీవు భూమి మీద వదిలే అధిక వ్యర్ధాలవల్ల…వాళ్లకి పుట్టకతోనే జబ్బులొస్తే, వాళ్లు నిన్ను ఎంత తిట్టూకోవాలీ….
ఏమి బదులు చెప్పాలో తెలియక బిక్కమొహం వేసి ఆలోచిస్తుంటే.. ఆదుకోవటానికా అన్నట్టు అర్ధాంగి వచ్చింది..
ఏమండీ రెండు వీధులవతల మా ఫ్రెండు అనూరాధ ఉంటుందిట, అడ్రస్ తీసుకున్నాను వెల్దాంరండి, చిన్నప్పుడు దానికి కన్నా నాకు అందగాడు దొరుకుతాడాని పందెం వేశాను…
వెళ్లొస్తాం రా అని చెప్పి లేచాను…
నేను చెప్పిన దాని గురించి సీరియస్ గా అలోచించు అన్నాడు…
కారు రోడ్డుక్కుతుంటే, ఇంటి దగ్గర స్విచ్ ఆఫ్ చేయకుండ వచ్చిన కంఫ్యూటర్, ఆ గదిలో లైటు, హాల్లోనూ , కిచన్ లోనూ వెలుగుతున్న లైట్లు, బోర్డ్ దగ్గర ఆఫ్‍చేయకూండా రిమోట్ తో ఆఫ్‍చేసిన టీవీ,వీసిడిప్లేయర్ పొద్దున సతీమణి బట్టలు వాషింగ్ మెషీన్ డ్రయర్ లో వేయటం కళ్లముందు కదిలాడాయి..

మీ ఫ్రెండింటికి మరెప్పుడన్నా వెళ్దాం .. ముందు ఇంటికి వెళ్లాలి అన్నాను…

మీ ఫ్రెండు మీకు ఏదో బ్రెయిన్ వాష్ చేసినట్టున్నాడు అంది…
బ్రెయిన్ వాష్ కాదు ‘బగ్ ఫిక్స్’ చేశాడు అన్న మాటలు నా పెదవులమీదే అగిపోయాయి…

Global Warming : Why it is everyone’s family affair

మొదలైన నాటి నించీ ఉన్నతమైన ప్రమాణాలతో కొనసాగుతున్న బ్లాగుల్లో శ్రీ తాడేపల్లి లలితా బాల సుబ్రహ్మణ్యం గారి కలగూరగంప ఒకటి. నిశితమైన పరిశీలన, హేతుబద్ధమైన విశ్లేషణ, విశాలమైన ఆలోచన, నిర్మొహమాటమైన రచన వీరి స్వంతం.
*** *** ***
Like many other terms which were once strictly confined to the circuit of science, but later found their way into common parlance, the phrase ‘global warming’ is a recent addition to our global vocabulary too. There are many such other terms in recent times which engage the attention of comman man, all for wrong reasons, all brought about singularly by man’s vices, his greed and excesses.

NO CLICHÉ, IT’S TRUE

The catastrophes in store on account of global warming are all there for everyone’s guess. They need no introduction or repeat emphasis. Apart from the obvious increase in climatic temperatures and the sea level, we will be forced to cope up with erratic seasons, disappearance of glaciers, icebergs, river streams, fall of agriculture and the resultant mega migrations as also the consequent threat to the conventional habitats of wild life and their food chain. It was all well-documented.

CRUX OF THE PROBLEM

It is no single person’s or nation’s making. We are all collectively involved in this environmental havoc being the potential stakeholders in this polluting version of civilization. Our favourite gadgets and gizmos are involved. Our jobs are involved. Our habits and hobbies are involved. Paradoxically, lifestyles are flourishing, but life itself is diminishing. The root-cause lies in utilizing nature not for survival but for commerce, in depleting life- resources without waiting for them to regenerate themselves, in not feeling answerable to the future generations.

IRRITANTS IN SENSITIZING PEOPLE

Curiously, even at a critical jucture as this, perceptions on global warming differ, with some scientists deeming it to be a periodical phenomenon occurring at regular intervals of time, say, for every few thousand years, having nothing to do with human activity. Similarly, the slowly advancing spike in temperatures can be felt more in the cold regions of the Northern hemisphere than other parts of the world in the initial stages, prompting the latter to take a lenient view of the problem. They tend to treat the year-by-year soaring of temperatures as a case of usual vagaries of weather until it begins to significantly tell on their farm yields. Besides, you should have a better model of life in your mind to be able to disagree with your immediate present. The younger generation of our times which constitutes more than half of the world population does not know what the world looked like before 1970. They were born and brought up on the lap of pollution. They wonder “What on earth are these old fogies worried about, while everything out there is perfectly hunky dory with spanky sports cars, sleek laptops and smart mobile phones ?” Putting an end to pollution sounds like putting an end to civilization.

LET’S ENCOURAGE ALTERNATIVE TECHNOLOGIES WHEREVER POSSIBLE

Let’s trace the chain of global warming which is brought about by pollution. In its turn, pollution is caused by commercial/massive scale production which is driven by rank consumerism. Therefore, the the entire debate finlly boils down to us, the consumers. As eco-conscious consumers, we need to voluntarily boycott certain products like plastics and other polymers, fossil fules, chemical based medicines and toilet products as also farm produce grown on chemical fertilizers and pesticides. At the risk of being dubbed as a misfit in the 21st century, I dare dream of a day when we muster enough courage to shed our modernist pretesions and inhibitions and start using animal energy for our transport needs.

Tadepalli Lalitha Bala Subrahmanyam, Hyderabad.